Ihuriro ry’ingabo za AFC/M23 na Twirwaneho ryatangaje ko ryahaye isomo ingabo zirwana ku ruhande rwa Leta ya Repubulika Iharanira Demokarasi ya Congo (RDC), nyuma y’imirwano yabereye mu gace ka Mukoko, muri Teritwari ya Fizi.
Col. Rugabo Fidèle wo muri Twirwaneho yavuze ko mu rukerera rwo kuri uyu wa Gatanu, ingabo zirwana ku ruhande rwa Leta zagabye igitero mu gace ka Mukoko, ariko ngo zibasubiza inyuma.
Ati: “Umwanzi mu cyerekezo cya Mukoko yateye abaturage saa 3:00 z’urucyerera. Umwanzi akaba ari gukubitwa nk’ingoma.”
Rugabo kandi yavuze ko ingabo za Leta ziri mu myiteguro yo kugaba ibitero mu gace ka Minembwe, ziturutse mu byerekezo birimo Rugezi, Kabanju, Kinyukwe, Gahwera, Gipupu, Bijombo na Rurambo.
Yabivuze mu gihe imirwano hagati y’impande zihanganye ikomeje mu bice byo mu misozi miremire ya Fizi.
Ku wa Kane, impande zombi zarwaniye mu gace ka Rugezi, aho Col. Rugabo yavuze ko ingabo zirimo FARDC n’iz’u Burundi zasubijwe inyuma.
About The Author
