Mu Mujyi wa Kinshasa, Umurwa Mukuru wa Repubulika Iharanira Demokarasi ya Congo (RDC), no mu bindi bice by’iki gihugu, haramukiye umubare munini w’abashinzwe umutekano barimo Ingabo na Polisi, mu gihe hateganyijwe imyigaragambyo y’abatavuga rumwe n’ubutegetsi.
Iyi myigaragambyo yateguwe n’abanyapolitiki batavuga rumwe n’ubutegetsi bahuriye mu ihuriro C64, basaba ko Perezida Félix Tshisekedi atahindura Itegeko Nshinga kugira ngo atazashobora kongera kwiyamamariza manda ya gatatu mu 2028.
Mu gitondo cyo kuri uyu wa Gatatu tariki ya 15 Nzeri 2026, mu mihanda itandukanye ya Kinshasa hagaragaye abasirikare n’abapolisi benshi. Leta ivuga ko bashyizwe mu mihanda mu rwego rwo kurinda umutekano no guhangana n’ibishobora kuvuka mu gihe cy’imyigaragambyo.
Abatavuga rumwe n’ubutegetsi bo bavuga ko kuba abashinzwe umutekano ari benshi mu mihanda bishobora kuba bigamije kubabuza gukora imyigaragambyo mu bwisanzure.
Ihuriro C64 rigizwe n’abanyapolitiki bakomeye barimo Martin Fayulu, Jean-Marc Kabund, Moïse Katumbi, Augustin Matata na Delly Sessanga.
Aba banyapolitiki bari bahamagariye abaturage kwitabira imyigaragambyo, bagasaba ko bayikorera hafi y’inyubako ikoreramo Inteko Ishinga Amategeko i Kinshasa ndetse n’ahatuye Abadepite hirya no hino mu gihugu.
Gusa mbere y’uko imyigaragambyo iba, abayobozi bayo n’inzego za Leta bumvikanye ko itazabera imbere y’inyubako ikoreramo Inteko Ishinga Amategeko, ahubwo ikabera mu bice biyikikije.
Urubuga Actualite.cd rwatangaje ko mu masaha ya mu gitondo i Kinshasa umwuka wari usanzwe. Amashuri n’amasoko byari bifunguye, mu gihe abakozi na bo bakomeje kujya mu mirimo yabo nk’uko bisanzwe.
Nubwo bimeze bityo, mu mihanda imwe n’imwe hatangiye kugaragara abantu bake bitabiriye imyigaragambyo.
No mu zindi Ntara z’igihugu hagaragaye ibikorwa by’abashinzwe umutekano. Muri Tanganyika, abasirikare bagaragaye binjira ku cyicaro cy’amashyaka arimo Ensemble pour la République ya Moïse Katumbi, mu Mujyi wa Kalemie.
Mu Mujyi wa Uvira, muri Kivu y’Amajyepfo, na ho abashinzwe umutekano bataye muri yombi bamwe mu barwanashyaka b’amashyaka atavuga rumwe n’ubutegetsi.
Iyi myigaragambyo ibaye nyuma y’iyabaye tariki ya 12 Kamena 2026, aho abantu bapfuye ndetse n’abandi barakomereka.
Leta yahakanye amakuru avuga ko abo bantu bishwe cyangwa bakomerekejwe mu myigaragambyo,ivuga ko amashusho y’imirambo n’abantu bavirirana byari byateguwe , ndetse ko amaraso yakoreshejwe ari ay’inyamaswa.
About The Author
