Lionel Messi yashyizwe ku rutonde rw’abakinnyi b’ikipe y’igihugu ya Argentine izakina umukino wa gicuti na Bénin ku wa 6 Ukwakira 2026, umukino uteganyijwe kuba uwo gusezera kuri iyi kipe nyuma y’imyaka isaga 20 ayikinira.
Uyu mukino uzabera kuri Estadio Monumental i Buenos Aires, ikibuga cya River Plate, gifite ubushobozi bwo kwakira abagera ku 85,000. Ni wo uzaba umukino wa nyuma Messi akinira Argentine nyuma yo gutangaza ko asezeye ku rwego mpuzamahanga.
Messi yatangaje ku wa 31 Kanama 2026 ko asezeye gukinira ikipe y’igihugu ya Argentine. Yavuze ko icyo cyemezo cyamubabaje cyane, ariko ko yumvaga igihe cyo guhagarika urugendo rwe muri iyi kipe cyari kigeze, nyuma yo guha byose ikipe y’igihugu.
Uyu rutahizamu w’imyaka 39 ni kapiteni wa Argentine wayoboye iyi kipe ku gikombe cy’Isi cya 2022. Afite kandi umuhigo wo kuba ari we watsindiye Argentine ibitego byinshi, ndetse akaba ari na we wayikiniye imikino myinshi, aho amaze kuyikinira 207 akanayitsindira ibitego 125.
Perezida w’Ishyirahamwe ry’Umupira w’Amaguru muri Argentine (AFA), Claudio Tapia, yatangaje ko Messi yatumiwe kugira ngo ahabwe umwanya wo gusezera imbere y’abafana b’igihugu cye.
Tapia kandi yatumiye abakinnyi bose bari bagize ikipe ya Argentine yatwaye Igikombe cy’Isi muri Qatar mu 2022, hamwe n’imiryango yabo, kugira ngo bifatanye na Messi muri uwo muhango wo kumusezeraho.
Mbere yo guhura na Bénin, Argentine izakina n’ikipe ya Bolivia ku wa 30 Nzeri i Córdoba, hanyuma ikine na Burkina Faso ku wa 3 Ukwakira i Buenos Aires. Messi ntazagaragara muri iyo mikino ibiri, ahubwo biteganyijwe ko azagaruka mu kibuga ku mukino wa nyuma na Bénin.
Uyu mukino uzaba umwanya wihariye kuri Messi, kuko ari wo uzasiga asoje urugendo rwe mu ikipe y’igihugu ya Argentine, amaze kuyikinira imyaka isaga 20 no kuyifasha kugera ku ntsinzi zikomeye zirimo Igikombe cy’Isi cya 2022 na Copa América ebyiri.
About The Author
