Umwanditsi David Irihose yashyize hanze igitabo yise The Invisible Work, gishingiye ku rugendo rwo kwiyubaka, kwiyakira no kongera kwisanga nyuma y’ibihe bikomeye umuntu aba yaranyuzemo.
Iki gitabo gishingiye ku rugendo rw’ubuzima bwa Irihose ndetse n’ibikorwa umuntu akora imbere muri we, bitajya bigaragarira abandi, ariko bikagira uruhare mu mitekerereze ye, mu marangamutima no mu buryo abona ubuzima.
Muri The Invisible Work, Irihose agaragaza ko inyuma y’ibyo abantu babona ku muntu, haba hashobora kuba hari urugendo rurerure rwo guhangana n’ibikomere, kwiyakira no kongera kwiyubaka.
Igitabo kivuga ku rugendo rwo kwimenya no kwiyubaka
David Irihose yibanda ku bantu banyura mu bibazo bitandukanye, birimo ibikomere by’amateka, ubwigunge, inzara n’izindi ngorane zishobora kutagaragara ku maso y’abandi.
Agaragaza ko umuntu ashobora gukomeza kubaho no gusangira n’abandi, mu gihe imbere muri we ahanganye n’ibibazo bikomeye. Ni yo mpamvu ashimangira akamaro ko kumva abandi, kubaha umwanya wo kwisanga no kutabacira urubanza hashingiwe ku byo tubona hanze gusa.
Muri iki gitabo, Irihose kandi ashishikariza abasomyi kuva mu mitekerereze yo guhora bahanganye n’ibibazo kugira ngo babashe kubaho gusa, ahubwo bagatangira gutekereza ku kubaka ubuzima bufite intego.
Ati: “Igitabo ni nk’ikarita ifasha umuntu guhindura imitekerereze, akava mu buryo bwo gutekereza bushingiye ku kurokoka gusa, akajya mu buryo bwo gutekereza bumufasha kubaka.”
Ubu butumwa bushingiye ku gitekerezo cy’uko umuntu ashobora gutangira urugendo rushya, akiga kwiyakira, gusobanukirwa ibyo yanyuzemo no gutangira kubaka ubuzima yifuza.
Ubuzima bwa David Irihose bwagize uruhare mu kwandika iki gitabo
David Irihose yavukiye muri Repubulika Iharanira Demokarasi ya Congo (DRC), nyuma amara imyaka isaga 11 ari impunzi muri Kenya. Yarangije amasomo muri Kisii University mu 2024, nyuma yimukira muri Leta Zunze Ubumwe za Amerika binyuze muri gahunda ya UNHCR yo gutuza impunzi mu bindi bihugu.
Irihose ni na we washinze imiryango ibiri ikorera muri Kenya, ari yo Unashamed Charity Organisation na Jikubali Africa, ikora ibikorwa byo gufasha abantu no guteza imbere ubushobozi bwabo.
Mu 2026, yatangije gahunda yise 5,000 Futures, igamije gufasha no kongera icyizere mu bantu 5,000 b’impunzi muri Afurika.
Urugendo rwe rwo kuba impunzi, kwiga, gufasha abandi no kwimukira muri Amerika ni bimwe mu byamufashije kubaka ibitekerezo bikubiye mu gitabo cye.
David Irihose, usanzwe atuye muri Leta Zunze Ubumwe za Amerika, ni ho yamurikiye igitabo The Invisible Work, aho inshuti ze n’abandi bamushyigikiye bari bitabiriye uyu muhango.
Iki gitabo gihamagarira abasomyi kwireba imbere, kumenya agaciro kabo no gutekereza ku buzima bifuza kubaka, batagendeye gusa ku byo abandi bababonamo cyangwa ku bikomere banyuzemo.
Abifuza kubona igitabo cyangwa kugira andi makuru kuri cyo, bashobora guhamagara kuri izi nimero:
- Kenya: +254 707 154437
- Rwanda: +250 782 094 490
- USA: +1 520 736 1677
Igitabo kandi kiboneka kuri Amazon: https://a.co/d/08KDgYpg
About The Author
