Umuhanzi Bruce Melodie yashyize hanze indirimbo ye nshya yise “Irya 4”, igizwe n’amategeko 10 atandukanye, aho buri tegeko ritanga ubutumwa ku buzima bwa buri munsi.
Bruce Melodie yari amaze amezi atatu ateguje iyi ndirimbo, nyuma yo kuyitangariza abakunzi be muri Kamena 2026, ubwo yari mu kiganiro n’itangazamakuru cyagarukaga ku bitaramo bya “2026 Summer Country Tour” yari ahuriyemo na The Ben, Bwiza na Kitoko.
Ibi bitaramo byabereye mu turere tune, aho bageze i Musanze ku wa 13 Kamena, i Nyagatare ku wa 20 Kamena, i Bugesera ku wa 27 Kamena, basoreza i Rubavu ku wa 4 Nyakanga.
Ubwo Bruce Melodie na The Ben bari muri icyo kiganiro, The Ben yatangaje ko agiye gushyira hanze indirimbo yise “Inshallah”, Bruce Melodie na we ahita avuga ko nyuma yayo azasohora “Irya 4”.
Iyi ndirimbo imaze gusohoka mu buryo bw’amajwi, yatangiye kuvugisha benshi kubera ubutumwa bukubiye mu mategeko 10 aririmbamo.
Itegeko rya mbere: Kwiga kwigira
Bruce Melodie aragira ati: “Iga kwigira bazanga, bitaribyo natwe tuzakwanga.”
Aha, agaruka ku kamaro ko kwigira no kwirinda kuba nyirandabizi, kuko abantu batakunze umuntu wiyitirira ko azi byose.
Itegeko rya kabiri: Kugirana ibanga
Aragira ati: “Iga kugirana ibanga, buriya na mukeba yakwatsa.”
Ubutumwa buri aha ni ukwirinda kuvuga buri kintu cyose, kuko uwo muhanganye ashobora kukimenya akagukoresha nabi cyangwa akakubangamira.
Itegeko rya gatatu: Kwakira ibihe bikomeye
Bruce Melodie aririmba ati: “Pfa kigabo, emera ko so zibaho, bro byaba ari fo wemeye ko birangira uko.”
Avuga ko umuntu akwiye gukomera mu gihe ahuye n’ibibazo, akemera ko ibihe bikomeye bibaho ariko agakomeza gushaka uko yabikemura aho kwiheba.
Itegeko rya kane: Kwirinda ubusambanyi
Iri ni ryo Bruce Melodie yahaye umwanya wihariye ndetse ni na ryo yitiriye indirimbo.
Aragira ati: “Ntugasambane, mureke niba yizanye cyangwa zikwakane.”
Ni ubutumwa bwo kwirinda ubusambanyi no kudakora imibonano mpuzabitsina n’umuntu wese utamuzi neza cyangwa utazi icyo agamije.
Itegeko rya gatanu: Gusubiramo irya kane
Itegeko rya gatanu rirasubiramo irya kane, aho agira ati: “Subiramo Irya 4.”
Akomeza avuga ko ubutumwa bwo kwirinda ubusambanyi atari we wabuzanye, ahubwo ko ari inama imaze igihe ihabwa abantu.
Itegeko rya gatandatu: Kwiyoroshya
Bruce Melodie aragira ati: “Iga kwiyoroshya mwana, iyo utangiye kwibona birapfa.”
Aha ashimangira ko kwishyira hejuru no kwibona bishobora gutuma umuntu atakaza abantu bamushyigikiraga.
Itegeko rya karindwi: Kwitondera abo ugendana
Ati: “Nufatisha iyi mihanda, ingona nabo ntabwo ari injanga.”
Ubutumwa buri muri iri tegeko busa n’ubwibutsa umuntu ko uko agenda atera imbere akwiye kurushaho kwitondera abo agendana ndetse n’abantu bamukikije.
Itegeko rya munani: Kwishyura amadeni
Aragira ati: “Peya, ideni rirajena.”
Iri tegeko ryibutsa abantu akamaro ko kwishyura ibyo bagurijwe, kuko ideni rishobora gukomeza kuba umutwaro iyo ridakemuwe ku gihe.
Itegeko rya cyenda: Kwitondera amategeko
Bruce Melodie aririmba ati: “Ntugakine n’itegeko nta lawyer.”
Aha yibutsa abantu kwirinda ibikorwa bishobora kubashyira mu bibazo by’amategeko. Iyo umuntu agize ikibazo cy’amategeko, asabwa gushaka umwunganizi kugira ngo amufashe mu buryo bukwiye.
Itegeko rya 10: Kumenya aho uri
Itegeko rya nyuma rigira riti: “Ntabwo uri uwa danger, niba uri ahantu udakwiye kuba uri.”
Ni ubutumwa bushishikariza umuntu kwisuzuma no gutekereza ku nzira arimo, akareba niba koko ari ahantu cyangwa mu buzima bumubereye.
Indirimbo “Irya 4” yakozwe mu buryo bw’amajwi na Producer Loader, usanzwe ukorana na Bruce Melodie mu mishinga itandukanye. Uyu producer kandi aherutse kumukorera indi ndirimbo yise “Detail”.
About The Author
