Impaka zikomeje hagati y’umunyarwenya Nyaxo, Aisha Inkindi na Burikantu na Buringuni, nyuma y’uko aba bombi bashyize hanze ubutumwa bunenga bamwe mu bafana ba Nyaxo, bakavuga ko batamushyigikiye uko bikwiye. Ibi byakurikiwe n’igisubizo cya Aisha wamugaragarije ko amushyigikiye, ndetse na Nyaxo ubwe wagize icyo avuga kuri izi mpaka.
Mu butumwa bwabo bwiswe “Ibaruwa igenewe abafana ba Nyaxo”, Burikantu na Buringuni banenze bamwe mu biyita abafana b’uyu munyarwenya, bavuga ko bamugaragarizaga ko bamushyigikiye ariko ntibabigaragarize mu kureba amashusho ye kuri YouTube.
Bagize bati:“Ingirwa bafana z’uwitwa Nyaxo ntizizadufane pe, turabivuze.”
Bakomeje kuvuga ko amashusho ya Nyaxo kuri YouTube yabonaga abantu bake bayarebye, nubwo hari abagaragazaga ko bamushyigikiye. Ibyo byatumye bagira Nyaxo inama yo kongera kwitabira ibikorwa bye, akirinda ubwibone ndetse akegera Killaman kugira ngo amufashe kongera kwiyubaka mu mwuga.
Nyuma y’ubu butumwa, Aisha Inkindi, uvuga ko yarushijeho kumenyekana abifashijwemo na Nyaxo, yagaragaje ko atemeranya n’uburyo Burikantu na Buringuni bamuvugagaho.
Aisha yavuze ko atakunze kwivanga mu mpaka, ariko ko kuri iyi nshuro yumvaga agomba kugira icyo avuga kuri Nyaxo. Yibukije abamunenga ko batagomba kumufata uko bishakiye, anagaragaza ko na we ashobora gusubiza abamuvugaho nabi.
Yagize ati: “Mwamuretse mugacuruza ibyanyu mukabaho, mukishimira ko muzageraho mukamurenga nk’uko mubyifuza. Si uko byoroshye, ariko ntimukamwibasire.”
Aisha yashimangiye ko bamwe mu bantu Burikantu na Buringuni bita ingirwa bafana ari bo bafashije Nyaxo kugera aho ageze. Yongeyeho ko n’ubucuruzi bwe, burimo na resitora, bwitabirwa n’abafana be.
Yanasabye aba bombi kumva ko kutemeranya n’umuntu bidaha umuntu uburenganzira bwo kumutuka, abasaba kureka Nyaxo n’abamushyigikiye bakabaho mu mahoro.
Nyaxo na we yagize icyo avuga kuri izi mpaka
Nyaxo na we ntiyatinze kugira icyo avuga kuri iki kibazo. Mu butumwa bwe, yagaragaje ko kumara umwanya uvuga nabi abandi bidafasha umuntu kugera ku ntego ze, ahubwo ko gukora cyane ari byo bishobora kumugeza ku musaruro yifuza.
Yagize ati: “Nkeka ko kuvuga umuntu nabi ntacyo bimara, ahubwo gukora cyane byakugeza kure. Tubane neza, ibindi ni ibidutera umwanya.”
Izi mpaka zakomeje kuvugisha benshi ku mbuga nkoranyambaga, aho buri ruhande rugaragaza uko rubona ikibazo cyo gushyigikira abantu bazwi, uruhare rw’abafana mu iterambere ryabo ndetse n’uburyo bakoresha YouTube.
Nubwo buri ruhande rwagaragaje uko rubona iki kibazo, ubutumwa bwa Nyaxo bwo bwibanze ku kamaro ko kwirinda gusebanya no gushyira imbaraga mu bikorwa biganisha ku iterambere.
About The Author
