Rayon Sports yageze mu ijonjora rya kabiri rya CAF Confederation Cup nyuma yo kunganya na Panthère Sportive du Ndé yo muri Cameroun ubusa ku busa, ariko ikomeza ku giteranyo cy’ibitego 1-1 kubera ko yari yatsindiye igitego hanze.
Kuri uyu wa Gatandatu, tariki ya 12 Nzeri 2026, Rayon Sports yari yakiriye Panthère Sportive du Ndé mu mukino wo kwishyura w’ijonjora ry’ibanze rya CAF Confederation Cup.
Umukino ubanza wari wabereye muri Cameroun, amakipe yombi anganya igitego kimwe kuri kimwe, bituma umukino wo kwishyura uba ingenzi mu kumenya ikipe ikomeza mu cyiciro gikurikiyeho.
Umutoza wa Rayon Sports nta mpinduka yakoze mu bakinnyi 11 babanje mu kibuga ugereranyije n’abakinnye umukino ubanza. Dande Junior, Nshimiyimana Emmanuel Kabange, Ganijuru Elie, Nshuti Didier, Charles Tchouplaou, Nisingizwe Christian, Muderi Akbar, Tambwe Ngongo Gloire, Elie Tatu, Atisso Kodjo na Kameni Junior ni bo bongeye kubanzamo.
Rayon Sports yatangiye umukino ishaka igitego hakiri kare. Ku munota wa mbere, Ganijuru Elie yahinduye umupira mwiza imbere y’izamu, ariko Kameni Herman Junior ananirwa kuwushyira mu izamu.
Ku munota wa 28, Ganijuru yongeye guhindura umupira mwiza imbere y’izamu, Tambwe Gloire Ngongo awushyiraho umutwe, ariko umunyezamu wa Panthère Sportive awufata.
Ku munota wa 31, Elie Tatu na we yabonye uburyo bwo gufungura amazamu ubwo yahinduraga umupira imbere y’izamu, ariko Kameni ntiyabasha kuwushyira mu izamu.
Rayon Sports yakomeje kotsa igitutu Panthère Sportive. Ganijuru Elie yongeye guhindura umupira mwiza imbere y’izamu, ariko umunyezamu arawuramburaho awushyira muri koruneri, na yo itagize icyo itanga.
Ku munota wa 45, Elie Tatu yafashe umupira arebana n’umunyezamu, ariko ishoti rye umunyezamu arifata nta ngorane. Nyuma y’umunota umwe gusa, Kameni yongeye gucomekera Elie Tatu umupira mwiza, asigarana n’umunyezamu mu rubuga rw’amahina, ariko uburyo yabonye ntiyabubyaza umusaruro.
Mu gice cya kabiri, Rayon Sports yakomeje gushaka igitego, ariko amahirwe yabonetse ku bakinnyi barimo Elie Tatu, Kameni Junior na Tambwe Gloire Ngongo ntiyabyaraga umusaruro.
Umukino warangiye Rayon Sports na Panthère Sportive du Ndé zinganyije ubusa ku busa.
Nubwo amakipe yombi yanganyije mu mikino yombi ku giteranyo cy’igitego 1-1, Rayon Sports ni yo yakomeje kubera igitego yatsindiye hanze mu mukino ubanza.
Mu ijonjora rya kabiri, Rayon Sports izahura n’ikipe izakomeza hagati ya Black Bulls yo muri Zambia na Atomic Ngomé yo muri Comores.
About The Author
