Ubushinjacyaha bwasabye Urukiko rw’Ibanze rwa Kicukiro ko Ntihanabayo Samuel, uzwi nka Kazungu akaba nyiri uruganda rwa Ingufu Gin, akurikiranwa afunzwe iminsi 30 y’agateganyo.
Kuri uyu wa 25 Kanama 2026, ni bwo Ubushinjacyaha bwatanze ubu busabe, ubwo Ntihanabayo n’abandi bantu 16 baburanaga ku ifungwa n’ifungurwa ry’agateganyo.
Muri aba 17 bakurikiranwe harimo abakozi n’abayobozi b’inganda zakoraga inzoga zitujuje ubuziranenge, ndetse n’abandi bantu baturuka mu nzego za Leta.
Ntihanabayo ari mu bantu bakurikiranwe mu iperereza ku bikorwa byo gukora no gukwirakwiza inzoga zitujuje ubuziranenge. Iri perereza ryagutse ryatumye Rwanda FDA ifunga inganda zitandukanye zikekwaho gukora inzoga zitubahiriza ubuziranenge busabwa.
Ubushinjacyaha bwagaragaje ko bugikeneye igihe cyo gukomeza iperereza, ari na yo mpamvu bwasabye ko Ntihanabayo afungwa iminsi 30 y’agateganyo.
Urukiko rw’Ibanze rwa Kicukiro ni rwo ruzafata umwanzuro ku busabe bw’Ubushinjacyaha, nyuma yo kumva impande zombi.
Umwanzuro w’urukiko ni wo uzagena niba Kazungu azakomeza gukurikiranwa afunze cyangwa niba azarekurwa agakurikiranwa ari hanze.
About The Author
