Abderrahim Taleb utoza APR FC, yagarutse ku bakinnyi basohotse muri iyi kipe harimo na Niyigena Clement, Claude ndetse n’abandi, yanashimangira ko akiri kwubaka ikipe.
Ibi yabigarutseho mu kiganiro n’itangazamakuru cyabaye ku munsi w’ejo nyuma y’umukino iyi kipe yatsinzemo Grade Républicaine ibitego bitatu ku busa.
Yagize ati “Nk’uko mubizi, mu mwaka ushize, twatwaye Shampiyona, twatwaye ibikombe bitatu hamwe n’ikipe ubu yavuyemo abakinnyi 10. Ku ruhande rw’ibumoso hari Clément [Niyigena], Claude [Niyomugabo], Bosco [Ruboneka] na Mugisha [Gilbert]. Uruhande rw’ibumoso ni imbaraga zimwe nk’uko bimeze iburyo.
Abo bakinnyi uko ari bane baragiye, hari Clément wagiye mu Misiri, Bosco na Claude bagiye mu yindi kipe, Mugisha sinzi aho yerekeje. Uzanye abandi bakinnyi bane, hari Zon wo muri Burkina Faso, hari Christian w’Umunyarwanda, Traoré [wo muri Mali] ukina hagati na Amani [wo muri Côte d’Ivoire] ukina ku ruhande.
Abo ni abakinnyi bane b’ubwenegihugu bune butandukanye, bavuye mu yindi mikinire, mu kindi gihugu, mu yindi shampiyona. Ni gute rero bahuzwa n’abo basanze mu ikipe? Rero bisaba igihe, bisaba imikino ya gicuti.”
Taleb kandi yavuze ko burigihe aba yifitiye icyizere kandi ko iyo agira ukwezi kwo gutegura CECAFA mbere y’uko ikinwa abantu bari kubona ikipe itandukanye.
yagize ati “Buri gihe mba mfite icyizere, nk’uko nabibwiye bamwe mu bafana, iyo ngira byibuze ukwezi mbere [y’iyi CECAFA], mwari kubona ikipe itandukanye.”
Umutoza wa APR FC, Taleb Abderrahim, yavuze ko Dauda Yussif atakinnye umukino wa Garde Républicaine kubera ko afite ikibazo ku kagombambari mu gihe umunyezamu Ernan Siluane yagiye guca mu cyuma ku Bitaro bya Gisirikare ku wa Mbere kubera ikibazo afite mu ivi.
About The Author
