Ikipe ya Rayon Sports ifitanye umukino wa Shampiyona ugomba kuyihuza na Rutsiro kuri iki cyumweru yateguye igikorwa cyo kwibuka abahoze ari abayobozi bayo, abakozi n’abakinnyi bazize Jenoside yakorewe abatutsi mu w’i 1994 kuri iki cyumweru i Rubavu ahahoze commune rouge mbere y’umukino.
Ni igikorwa kizatangira saa tatu n’igice za mu gitondo aho hazakorwa urugendo rwo kwibuka kuva kuri stade Umuganda I Rubavu bakagera ku rwibutso rw’ahahoze ari commune rouge ahazabera ibikorwa bitandukanye birimo no gusoma amazina y’abahoze ari abakinnyi n’abayobozi bazize Jenoside yakorewe abatutsi mu w’i 1994.
Iki gikorwa cyo kwibuka cyateguwe na Association Rayon Sports bikaba biteganyijwe ko kigomba kurangira saa sita z’amanywa ubundi bakajya kwitegura umukino wa Shampiyona saa cyenda bafitanye na Rutsiro kuri stade Umuganda i Rubavu.
Ikipe ya Rayon sports ikaba isabwa gutsinda umukino ifitanye na Rutsiro mu rwego rwo gukomeza kwiruka ku gikombe cya shampiyona
About The Author
