Iran yihanangirije Leta Zunze Ubumwe za Amerika ko igiye kwihimura vuba kandi mu bitero bikomeye kurushaho, mu gihe umwuka mubi hagati y’ibihugu byombi ukomeje gukaza umurego.
Umuvugizi w’Inteko Ishinga Amategeko ya Iran, Mohammad Bagher Ghalibaf, yavuze ko Abanyamerika bakwiye kumenya hakiri kare ko uko ibintu byari bisanzwe bigenda byahindutse.
Mu butumwa bwatangajwe n’ibitangazamakuru bya Leta muri Iran ku Cyumweru, Ghalibaf yagize ati: “Abanyamerika bagomba kumva mbere y’uko igihe kigera ko amategeko y’umukino yahindutse.”
Ibi yabivuze nyuma y’icyumweru imirwano hagati ya Iran na Amerika yongeye kubura. Bukeye bwaho, Washington yatangaje ko yagabye ibitero ku mato atwara peteroli ya Iran, mu rwego rwo kwihimura ku bitero Tehran yari yagabye ku mato y’intambara ya Amerika mu mazi yo muri aka karere.
Ku Cyumweru, ibitangazamakuru bya Leta muri Iran byatangaje kandi ko Ingabo zirwanira mu mazi z’iki gihugu zagabye igitero ku bwato bw’Abanyamerika bugenzurwa kure, bwageragezaga kwinjira mu Ntera ya Hormuz.
Gusa, igisirikare cya Amerika cyahakanye ayo makuru. Kapiteni Tim Hawkins, umuvugizi w’Ubuyobozi bw’Ingabo za Amerika zishinzwe ibikorwa byo mu Burasirazuba bwo Hagati (Centcom), yavuze ko ayo makuru yatangajwe n’ibitangazamakuru bya Leta muri Iran ari “ikinyoma cyuzuye.”
Na Leta Zunze Ubumwe za Amerika yakomeje gukoresha imvugo ikomeye. Umunyamabanga wa Leta ushinzwe Ingabo, Pete Hegseth, yanditse ku mbuga nkoranyambaga ku wa Gatandatu ko Iran iramutse irashe ku mato ya Amerika, na yo izasenya amato ya peteroli ya Iran.
Iyi mirwano yongeye kubura nyuma y’uko amasezerano y’agahenge k’iminsi 60 hagati ya Iran na Amerika arangiye mu kwezi gushize. Ako gahenge kari kamaze kuzana ituze ugereranyije, ariko karangira Amerika yongeye kugaba ibitero ku cyumweru cyakurikiyeho.
Kuva icyo gihe, ibitero byakomeje mu cyumweru cyose. Amerika yagabye ibitero ku birindiro bitandukanye bya Iran, mu gihe Iran na yo yibasiraga inyungu n’ibirindiro bya Amerika mu karere, birimo ibiri muri Leta Zunze Ubumwe z’Abarabu, Bahrain, Kuwait na Jordan.
Perezida wa Amerika, Donald Trump, yavuze ko iyi mirwano itazamara “igihe kinini”. Iyi mvugo yakunze kugarukwaho na we ndetse n’abayobozi bo mu buyobozi bwe kuva imirwano yatangira muri Gashyantare, ubu ikaba imaze hafi amezi atandatu.
Nubwo ibihugu byombi bimaze igihe bigirana ibiganiro bigamije kurangiza amakimbirane, kugeza ubu nta masezerano arambye y’amahoro aragerwaho. Nta kimenyetso gikomeye kandi cy’uko ibiganiro bishya bigiye guhita bitanga umuti w’iki kibazo.
Inzira y’amato ya Hormuz, iri hagati ya Iran na Oman, ifite akamaro gakomeye ku isoko mpuzamahanga rya peteroli na gaz. Kuva imirwano yatangira, iyi nzira y’amazi isa n’iyafunzwe, bituma iba kimwe mu bikoresho bikomeye Iran ishobora gukoresha mu gushyira igitutu kuri Amerika.
Tehran yakomeje gushimangira ko itazemera gutakaza burundu ububasha cyangwa uruhare runaka ifite kuri iyi nzira y’amazi.
Ku rundi ruhande, Perezida Trump yatangaje ko Inzira ya Hormuz “ifunguye”, mu gihe igisirikare cya Amerika kiri gufasha amato kuyinyuramo akoresheje inzira yo mu majyepfo.
About The Author
