Al Hilal SC yatsinze Tusker FC yo muri Kenya ibitego 2-0 mu mukino ubanza wa CECAFA Kagame Cup wo mu tsinda C.
Mbere y’uko uyu mukino utangira hafashwe umunota wuguha icyubahiro umutoza Kanyankore Gilbert Younde witabye Imana ku munsi w’ejo. Ni umukino wabaye kuri iki cyumweru sa Cyenda (15h00) kuri sitade Amahoro.
Ni umukino watangiye ikipe ya Tusker FC itozwa Julien Mette, igerageza kwataka izamu rya Al Hilal SC, ariko uko iminota y’umukino yiyongeraga niko ikipe ya Al Hilal SC yasomaga umukino biza gutuma ku munota wa 30 Al Hilal SC ibona igitego cya mbere cyatsinzwe na Kamaradini Mamudu.
Ikipe ya Tusker FC yakomeje gushaka uko yakwishyura iki gitego igice cya mbere kitari cyarangira ariko umuzamu wa Al Hilal SC ababana ibamba.
Igice cya mbere cyarangiye ari ari igitego kimwe cya Al Hilal ku busa bwa Tusker FC.
Igice cya kabiri cyatangiye ubona ko ikipe ya Tusker FC yagiye ku gitutu cyo gushaka igitego cya kabiri binyuze kuri barutahizamu bayo.
Ni igice cya kabiri ikipe ya Tusker FC yabonyemo kufura ebyeri nziza zaterwaga neza na Kapiteni Aboud Omar ariko umuzamu wa Al Hilal akazikuramo.
Kapiteni wa Tusker FC Aboud Omar yazonze cyane barutahizamu ba Al Hilal SC kuko byabaga bigoye kumunyuzaho umupira.
Aboud Omar wigaragaje cyane muri uyu mukino akina nka myugariro kuri 5.
Iminota 90 isanzwe y’umukino yarangiye ikipe ya Al Hilal igifite igitego kimwe, umusifuzi yongeyeho iminota 6 y’inyongera arinayo yabonetsemo igitego cya kabiri, ku munota wa 4 ku ishoti ryatewe n’umunya-Ghana Salim Adams maze umuzamu wa Tusker FC ananirwa kuwukuramo.
Uyu mukino kandi wanarebwe na Perezida w’ishyirahamwe ry’umupira w’amaguru mu Rwanda (FERWAFA) Shema Ngoga Fabrice.
About The Author
