Ihuriro AFC/M23 ryatangaje ko ingabo za Repubulika Iharanira Demokarasi ya Congo (RDC) n’imitwe ikorana na zo byagabye ibitero bikomeye mu bice bitandukanye biri ku rugabano rwa Teritwari ya Masisi na Walikale, mu Ntara ya Kivu y’Amajyaruguru.
Umuvugizi wa AFC/M23, Lawrence Kanyuka, yavuze ko guhera saa kumi n’imwe za mu gitondo ku wa 10 Nzeri 2026, ingabo za Leta ya RDC zakomeje kurasa mu bice birimo Ihula, Malemo, Minjenje, Kibati n’ahandi bihana imbibi.
Kanyuka yavuze ko ibyo bitero byatumye abaturage benshi bahunga ingo zabo, basiga inyuma imitungo yabo mu rwego rwo kurokora ubuzima.
Ati: “Ibitero birakomeje ubu dutangaza aya makuru. Byateye abasivili benshi guhunga, bata ingo zabo n’imitungo yabo kugira ngo barokoke ibitero bya Kinshasa.”
Yongeyeho ko ahagana saa moya za mu gitondo, ingabo za Leta zagabye ibitero mu gace ka Buhimba no mu nkengero zako muri Teritwari ya Masisi, zikoresha abasirikare barwanira ku butaka ndetse n’intwaro zirimo Mortier 82 mm na ‘machine guns’.
Ingabo za Leta n’abarwanyi bo mu ihuriro Wazalendo, baheruka gutakaza bimwe muri ibyo bice, bagabye ibitero baturutse mu bice bya Walikale byegereye Masisi. AFC/M23 ivuga ko intego ari ukongera kugenzura inzira ya Buhimba-Mahanga ihuza Teritwari ya Masisi na Walikale.
Kanyuka yavuze ko AFC/M23 ihangayikishijwe cyane n’ubwicanyi avuga ko ingabo za Leta zikomeje gukorera Abanye-Congo, ashimangira ko iri huriro rizakomeza kurinda abaturage no kubarwanirira rikoresheje uburyo bwose bushoboka.
About The Author
