Pasiteri Nzayitegaho Gédéon, Umunyamulenge uyobora Itorero Carmel rikorera ku Mutukura, yafashwe n’abakozi b’Urwego rw’Iperereza rw’u Burundi, SNR (Service National de Renseignement), ku wa 10 Nzeri 2026.
Amakuru avuga ko uyu mupasiteri yafatiwe ku rusengero asanzwe ayobora, ruherereye ku Mutukura, 7ème Avenue, mu gihe yari imbere y’abanyeshengero.
Abakozi ba SNR bamubwiye ko bamujyanye ahazwi nka Documentation, hafi ya Cathédrale Regina Mundi i Bujumbura. Icyakora, nta mpamvu y’ifatwa rye cyangwa ibyo yaba akekwaho byatangajwe.
Kuva yafatwa, abantu be bavuga ko batemerewe kongera kumusura. Bavuga ko kugeza ubu batamenya aho afungiye, uko amerewe ndetse n’impamvu nyayo yatumye atabwa muri yombi.
Ifatwa rya Pasiteri Nzayitegaho rije nyuma y’ifatwa rya Nkunda Kilayi Jalos, na we Umunyamulenge, wafatiwe ku Kibuga Mpuzamahanga cy’Indege cya Bujumbura ku wa 8 Nzeri 2026.
Nyuma yaje kumenyekana ko Nkunda Kilayi Jalos na we ari umupasiteri, nubwo ibyo bitari byagaragajwe mu makuru ya mbere yatangajwe ku ifatwa rye.
Mu gihe cy’iminsi ibiri gusa, aba Banyamulenge bombi bafashwe n’inzego z’umutekano cyangwa z’iperereza mu Burundi, ibintu byateje impungenge mu bantu bo muri uwo muryango.
Kugeza ubu, nta tangazo rya SNR cyangwa irindi rwego rwa Leta y’u Burundi ryashyizwe ahagaragara risobanura impamvu Pasiteri Nzayitegaho Gédéon yafashwe.
Abantu be bakomeje gusaba ko bamenyeshwa aho ari n’impamvu afunzwe, mu gihe amakuru arambuye ku buzima bwe n’aho afungiye akomeje kuba make.
Iri fatwa rije kandi mu gihe bamwe mu Banyamulenge bakomeje kugaragaza impungenge ku bijyanye n’ifatwa n’iperereza bikorerwa bamwe mu bagize uyu muryango baba mu Burundi.
About The Author
