Itsinda ry’abashakashatsi bo muri NHS Blood and Transplant rifatanyije n’abashakashatsi bo muri Kaminuza ya Bristol yo mu Bwongereza ryatangaje ko ryavumbuye ubwoko bushya bw’amaraso bwiswe MAL.
Bukaba bubaye ubwa 47 bumaze kuboneka ku Isi. Ubu bushakashatsi bwasobanuye inkomoko ya Antigen ya AnWj yari imaze imyaka 50 itarasobanuka.
Ubu bwoko bwavumbuwe bwa mbere mu 1972 ariko inkomoko yabwo ikaba itari izwi. Antigen ni protein zifasha umubiri kumenya no kwirinda indwara.
AnWj kandi iboneka ku bantu barenga 99,9% ku Isi, gusa bake cyane bayibura bashobora kugira ibibazo bikomeye igihe bahawe amaraso arimo iyi antigen.
Ubushakashatsi bwerekanye ko AnWj ikomoka ku bwoko bw’amaraso bwa MAL, kandi iyo hari igice cya DNA kibuze, umuntu ashobora kuba AnWj-negative.
Umushakashatsi mukuru muri IBGRL Red Cell Reference, Louise Tilley, yagize ati: “Inkomoko y’ubwoko bw’amaraso ya AnWj yari yarabaye amayobera mu myaka irenga 50 ishize. Kuba twashoboye kuyimenya ni intsinzi ikomeye, kandi bizadufasha cyane kwita ku barwayi.”
Na ho Prof. Ash Toye wo muri Kaminuza ya Bristol yavuze ati: “Ni ibintu bishimishije kuba twashoboye gukoresha ubushobozi bwacu kugira ngo tumenye neza ubwoko bw’amaraso ya AnWj.” Ubu bushakashatsi buzafasha cyane mu gutanga amaraso no kurengera ubuzima bw’abarwayi.
About The Author
