Umukinnyi w’icyamamare muri ruhago, Lionel Messi, ari hafi kongera kugira ikipe y’umupira w’amaguru muri Espagne, nyuma yo kugera ku bwumvikane bwo kugura imigabane 100% ya CD Eldense ikina mu cyiciro cya kabiri.
Messi yamaze kumvikana ku ihame ryo kugura iyi kipe yari isanzwe ifitwe n’itsinda ry’abashoramari bo muri Colombia, TH Soluciones Group S.A.S. Icyakora, amasezerano ntararangira burundu kuko hakenewe kubanza gukorwa inzira z’amategeko no kwemezwa n’urwego rukuru rwa Siporo muri Espagne (CSD).
Mu gihe aya masezerano yaramuka arangiye, Messi azaba atunze amakipe abiri muri Espagne, kuko muri Mata 2026 uyu Munya-Argentina yari yaguzwe UE Cornellà, ikipe ikina mu cyiciro cya gatatu muri iki gihugu.
CD Eldense ibarizwa mu mujyi wa Elda, mu Ntara ya Alicante. Iyi kipe imaze imyaka myinshi ikina mu byiciro byo hasi, ariko ubu iri mu cyiciro cya kabiri cya ruhago muri Espagne.
Nubwo Messi agiye kwibikaho iyi kipe, Eldense ntabwo iri mu bihe byiza muri iyi minsi. Mu mikino ine ya mbere ya shampiyona, yabonye amanota abiri gusa ndetse iri mu myanya ya nyuma y’imbonerahamwe.
Ibi byatumye uwari umutoza wayo, Claudio Barragán, asezererwa ku mirimo ye nyuma y’itangiriro ritari ryiza rya shampiyona.
Messi agiye kwibikaho iyi kipe mu gihe amategeko ya Espagne agenga imishahara y’abakinnyi ashobora gutuma bigorana kuyishoramo amafaranga menshi mu kugura abakinnyi bashya, mu gihe hari abakinnyi bashya iyi kipe ikeneye kugira ngo yongere imbaraga.
About The Author
