Mu irushanwa rya Afurika ry’ibihugu, AFCON 2025, riri kubera muri Moroco, abakinnyi ba APR FC bakomeje kugaragaza urwego rushimishije mu makipe y’ibihugu, by’umwihariko mu ikipe y’igihugu ya Uganda Cranes.
Abakinnyi Denis Omedi na Ronald Ssekiganda bashyizwe mu bakinnyi 28 batoranyijwe ku mugaragaro n’umutoza mukuru wa Uganda, Paul Put, bagiye guhagararira igihugu cyabo muri iri rushanwa rikomeye ku mugabane wa Afurika.
Uganda iri mu itsinda rikomeye rihuza Tunisia, Nigeria na Tanzania, aho umukino wa mbere wayo wahuje Tunisia.
Nubwo Uganda yatsinzwe ibitego 3-1, Denis Omedi, rutahizamu wa APR FC, yanditse amateka atsinda igitego cya mbere muri AFCON.
Omedi yinjiyemo asimbuye mu gice cya kabiri, agaragaza umuvuduko n’ubushake, bituma afasha ikipe ye kubona igitego cy’icyubahiro cyashimishije abakunzi ba ruhago bo muri Uganda n’abafana ba APR FC muri rusange.
Ku rundi ruhande, Ronald Ssekiganda na we yahawe amahirwe yo gukina, agaragaza ubunararibonye n’imbaraga mu kibuga hagati.
Nubwo iminota ye yo gukina itari myinshi, yagaragaje imyitwarire myiza n’ubuyobozi, ashyigikira bagenzi be mu bihe bikomeye by’umukino.
Muri rusange, kwitwara kw’aba bakinnyi ba APR FC muri AFCON 2025 bikomeje guhesha ishema ikipe yabo n’umupira w’amaguru wo mu Rwanda, bigaragaza ko APR FC ikomeje gutanga abakinnyi bafite ubushobozi bwo guhangana ku rwego rwa Afurika.
About The Author
