Umugaba Mukuru w’Ingabo z’u Rwanda, Gen. Mubarakh Muganga, yasabye abakinnyi ba APR FC kwitwara neza mu mukino bagiye guhuramo na Zamalek SC yo mu Misiri, bakongera kwerekana urwego rwiza bagaragaje ubwo basezereraga Les Aigles du Congo mu irushanwa rya CAF Champions League.
Gen. Mubarakh Muganga, usanzwe ari Umuyobozi w’Icyubahiro wungirije wa APR FC, yatanze ubu butumwa ubwo yari kumwe n’Umugaba Mukuru w’Inkeragutabara, Maj Gen Alex Kagame, mu ruzinduko bagiriye kuri iyi kipe kugira ngo bayitere ingabo mu bitugu mbere y’umukino ukomeye ifitanye na Zamalek.
Aba bayobozi basuye abakinnyi n’abatoza ba APR FC ku mugoroba wo ku wa Kane, tariki ya 15 Ukwakira 2026, ubwo iyi kipe yari mu myiteguro ya nyuma y’umukino uteganyijwe kuri uyu wa Gatanu, tariki ya 16 Ukwakira 2026, kuri Stade Amahoro i Remera.
Mu butumwa yahaye abakinnyi n’abatoza, Gen. Mubarakh Muganga yabasabye kuzagaragaza ubushobozi bwabo nk’uko babigenje mu mukino uheruka wa CAF Champions League, aho APR FC yasezereye Les Aigles du Congo iyitsinze ibitego 3-0.
Yagaragaje ko ubuyobozi n’abakunzi b’iyi kipe bayifitiye icyizere, kandi ko biteze ko abakinnyi bazakomeza kwitwara neza no muri uyu mukino uhuza APR FC na Zamalek.
Yagize ati: “Twese tubafitiye ikizere nk’icyo twari tubafitiye mbere yo gusezerera ikipe mwahuye na yo, Les Aigles du Congo. No kuri uyu mukino twiteze ko muzitwara neza. Hano hanze buri wese yiteguye kubashyigikira, namwe tubitezeho kubigenza nk’uko byagenze ubushize.”
Gen. Mubarakh yakomeje asaba abakinnyi gukora ibishoboka byose kugira ngo bashimishe Abanyarwanda, abibutsa ko hari intambwe bamaze gutera mu mikino iheruka kandi ko impinduka bagaragaje zatangiye gutanga umusaruro.
Yashimangiye ko Abanyarwanda bo hirya no hino biteguye gushyigikira APR FC, bityo ko abakinnyi bakwiye kubyaza umusaruro iyo nkunga babona, bakitwara neza mu kibuga.
Ati: “Mufite byinshi mwakosoye mu mikino yagiye itambuka kandi byatanze umusaruro. Ibyo tubitezeho ejo ni ugushimisha Abanyarwanda aho bari hose, kandi na bo biteguye kubatera ingabo mu bitugu. Ibindi byacu bitureba nk’ubuyobozi, nyuma y’umukino muzi aho duhigurira, no kuri iyi nshuro ni ko bizagenda.”
Nyuma y’ubutumwa bwa Gen. Mubarakh Muganga, Maj Gen Alex Kagame na we yagiranye ibiganiro n’abakinnyi, ababwira ibikwiye kubafasha kwitwara neza imbere ya Zamalek.
Maj Gen Alex Kagame afite amateka yihariye muri APR FC, kuko yayoboye iyi kipe ubwo yasezereraga Zamalek SC mu mwaka wa 2004. Yifashishije ayo mateka, yibukije abakinnyi ko gutsinda umukino ukomeye bisaba ubufatanye, kumva amabwiriza y’umutoza no gukorera hamwe.
Yabasabye kutibanda ku bushobozi bw’umukinnyi umwe, ahubwo bagashyira imbere inyungu z’ikipe, buri wese akagira uruhare mu gufasha mugenzi we igihe ahuye n’imbogamizi mu kibuga.
Yagize ati: “Ntimugire ngo hari ikindi gitanga intsinzi, ni ugushyira hamwe nk’ikipe, ukamenya ko aho mugenzi wawe ananiwe umufasha, kandi bitanga umusaruro ugaragara. Hagati yanyu muganire, muhane ibitekerezo, ahasigaye musenyere umugozi umwe kandi twese tubari inyuma.”
APR FC irakira Zamalek SC yo mu Misiri kuri uyu wa Gatanu, tariki ya 16 Ukwakira 2026, saa kumi n’ebyiri z’umugoroba, kuri Stade Amahoro i Remera, mu mukino utegerejwe na benshi.
About The Author
