Korali Ukuboko Kw’Iburyo Yahumurije Abacitse Intege Ibinyujije Mu Ndirimbo “Lazaro”_VIDEO

Korali Ukuboko kw’Iburyo ikorera umurimo w’Imana muri ADEPR Gatenga yashyize hanze indirimbo nshya yise “Lazaro”, ifite ubutumwa bwo guhumuriza abacitse intege, abihebye n’abumva ko ibibazo bahanganye na byo byarenze ubushobozi bwabo.

Iyi ndirimbo ishingiye ku nkuru ya Lazaro ivugwa muri Bibiliya, aho Yesu Kristo yazuye Lazaro wari umaze iminsi ine ashyinguwe, igaragaza ko Imana ishobora gukora ibirenze ibyo abantu batekereza ko bishoboka.

Mu kiganiro, Kwizera Seth, umuyobozi wa Korali Ukuboko kw’Iburyo, yasobanuye ko igitekerezo nyamukuru cy’iyi ndirimbo ari ugushishikariza abantu gukomeza kwizera Imana, n’igihe babona ko ibisubizo by’ibibazo byabo byatinze kuboneka.

Yavuze ko bashiki ba Lazaro, Mariya na Marita, bari bazi ko Yesu yari inshuti ya musaza wabo. Igihe Lazaro yarwaraga, bamutumyeho kugira ngo aze kumureba, kuko bari bazi imbaraga ze kandi bashobora kuba barizeraga ko yari kumukiza.

Gusa Yesu ntiyahise aza, ahubwo yageze aho Lazaro yari ari amaze iminsi ine ashyinguwe. Icyo gihe abantu benshi bashoboraga kumva ko ibintu byari byarangiye, ariko Yesu agaragaza ko nta kidashobokera Imana.

Kwizera Seth yavuze ko ari na bwo butumwa iyi korali yifuza ko abantu bakura muri “Lazaro”, cyane cyane abumva ko ibibazo byabo byabananiye.

Yagize ati: “Ibibazo byawe byakunaniye, ubiharire Yesu abikemure mu buryo bwe.”

Indirimbo igamije guhumuriza abatakaje ibyiringiro

Umuyobozi wa Korali Ukuboko kw’Iburyo yasobanuye ko “Lazaro” igenewe by’umwihariko abantu bihebye, abacitse intege n’abumva ko Imana yatinze kubasubiza.

Yatanze urugero rw’umuntu ushobora kuba amaze igihe ashakisha akazi ariko ntakabone, cyangwa akaba ahanganye n’ibindi bibazo by’ubuzima, akumva ko nta kindi gisigaye yakora.

Yavuze ko ubutumwa bw’iyi ndirimbo ari ukubibutsa ko kuba umuntu atarabona igisubizo atagomba guhita atekereza ko nta cyizere gisigaye, kuko Imana ishobora gukoresha inzira atatekerezaga kugira ngo imutabare.

Bityo, iyi ndirimbo irashishikariza abantu gukomeza kwizera, kwihangana no gutegereza igisubizo cy’Imana, n’igihe ibintu bisa n’ibyabaye iherezo.

Imbogamizi z’amikoro zikomeje kugira ingaruka ku muziki wa Gospel

Kwizera Seth yavuze ko imwe mu mbogamizi zikomeye amakorali ahura na zo mu gutegura indirimbo ari ubushobozi bw’amafaranga bukenerwa kugira ngo imishinga igerweho.

Yasobanuye ko gukora indirimbo, cyane cyane izifashisha uburyo bwa live recording, bisaba amikoro atari make, kandi ko kuba amakorali amwe adakora bene iyo mishinga bitavuze ko abura ibihangano byiza.

Yongeyeho ko umuziki wa Gospel ukomeje kugira abakunzi, ariko ko hakiri urugendo kugira ngo abantu benshi bawushyigikire, cyane cyane mu bikorwa bisaba amafaranga yo gutunganya indirimbo.

Yavuze ko hari abatarumva neza impamvu amafaranga akenerwa mu gutegura indirimbo zishingiye ku Ijambo ry’Imana, nyamara na zo zisaba ibikoresho, abakozi n’ubundi bushobozi kugira ngo zigere ku bazumva.

“Ikidendezi” na “Lazaro” bihurira ku butumwa bwo kwizera Imana

Kwizera Seth yavuze ko buri ndirimbo ya Korali Ukuboko kw’Iburyo iba ifite umwihariko wayo, bitewe n’ubutumwa igamije kugeza ku bayumva.

Yatanze urugero rw’indirimbo yabo yitwa “Ikidendezi”, ishingiye ku nkuru y’umuntu wari umaze imyaka 38 arwaye, ivugwa muri Yohana 5:1-9.

Iyo ndirimbo igaruka ku mbaraga za Yesu, waje agafasha uwo murwayi atagombye gutegereza ko amazi y’ikidendezi ahindurirwa kugira ngo akire.

Yasobanuye ko ubutumwa buyikubiyemo ari uko nubwo umuntu ashobora kumara igihe kinini ahanganye n’ikigeragezo, Imana igifite ubushobozi bwo kumufasha.

Ni na ko bimeze kuri “Lazaro”, kuko na yo yibutsa abantu ko igihe ikibazo kimaze si cyo kigena niba Imana igishoboye kugikemura.

Korali Ukuboko kw’Iburyo yatangaje ibitaramo mu munsi iri imbere.

Korali Ukuboko kw’Iburyo yatangaje ko ku wa 1 Ugushyingo 2026 izakora igitaramo muri ADEPR Kacyiru, aho izaba ifite umwanya wo kuramya no guhimbaza Imana no kugeza ubutumwa bwiza ku bantu binyuze mu ndirimbo.

Iki gitaramo kizakurikirwa n’ikindi gikomeye giteganyijwe ku wa 6 Ukuboza 2026, kizabera muri ADEPR Gatenga, mu rusengero rushya rw’iyi korali.

Nk’uko Kwizera Seth yabivuze, iki gitaramo kizaba umwanya wo gushyira hanze izindi ndirimbo nshya z’iyi korali ndetse na album yayo ya gatanu.

Ku bijyanye na gahunda z’umwaka wa 2027, yavuze ko zitaranozwa neza, ariko ko harimo gutegurwa undi mushinga wa live recording.

Yasabye abakunzi ba Korali Ukuboko kw’Iburyo gukomeza kuyikurikira ku mbuga nkoranyambaga zirimo Instagram, X na Facebook, ndetse no kuyumva kuri YouTube.

Korali Ukuboko kw’Iburyo imaze imyaka irenga 30 mu murimo w’Imana

Korali Ukuboko kw’Iburyo yatangiye umurimo w’Imana mu 1989, ubu ikaba igizwe n’abaririmbyi barenga 150.

Mu myaka imaze ikora uyu murimo, yamenyekanye mu ndirimbo zitandukanye zakunzwe n’abakristo benshi, zirimo “Ikidendezi”, “Rukundo ni Yesu”, “Imirimo”, “Imitima yacu”, “Hashimwe Yesu”, “Abera b’Imana” na “Ndi Imana mu misozi”, hamwe n’izindi.

Binyuze mu ndirimbo zayo, iyi korali ikomeje kugira uruhare mu kuramya no guhimbaza Imana, ndetse no kugeza ubutumwa bwiza ku bantu batandukanye.

Indirimbo nshya “Lazaro” ikomeza uwo murongo, yibanda ku kwizera, kwihangana no gukomeza kugira ibyiringiro mu bihe bikomeye. Ubutumwa bwayo buributsa abantu ko n’iyo ibibazo byaba byarabarenze, bashobora gukomeza kwizera Imana no kuyiharira ibyo bananiwe gukemura.